Verwysing: Matt. 28:18; Joh.
3:23; Hand. 2:41; 8:36-39;Rom. 6:3-6
Beskrywing: Vir ons is die leer oor die doop van
gelowiges nie ‘n ingewikkelde of komplekse onderwerp nie, maar eerder ‘n saak
van geloof in die Woord van God. Ons glo dat die Bybel ons leer dat die doop
van die gelowige ‘n openbare getuienis en afbeelding is van die gelowige se
vereenselwiging met die dood, begrafnis en opstanding van die Here Jesus
Christus. Met die doop maak die gelowige
‘n bewustelike en openbare verklaring voor getuies van die afsterwe van die ou
mens en die wedergeboorte van die nuwe mens, wat nou in Christus is (Rom.
6:3-6). Wie mag gedoop word? Die doop is die onder-water-dompeling van
‘n gelowige man vrou of kind, wat die evangelie verstaan en reeds vrywilliglik
sy of haar geloof in die Here Jesus teenoor ander mense bely het (Hand.
8:36-39; Joh. 3:23; Rom. 6:3-5). Kan die besprinkeling van babas hierdie doop
wees? Tot en met die derde eeu na Christus is daar geen enkele
besprinkeling toegepas nie. Die Nuwe Testamentiese kerk het soos Hand. 2:38 verklaar
die onderdompeling gebruik om ‘n bekeerling te doop. Die oorsprong van die leer
van die babadoop is moeilik om na te spoor, maar die geskiedenis lei ons om te
dink dat dit in die raadsbesluite van die valse Rooms Katolieke stelsel begin
het en kan nie as die Bybelse instelling van die doop aanvaar word nie. Die
Gereformeerde denominasies leer as ‘n deel van die verbondsteologie dat die
babadoop of besprinkeling die plaasvervanger is vir die Joodse besnydenis, maar
hierdie leerstelling kan egter nie letterlik so uit die Bybel gestaaf word soos
die doop van gelowiges nie. Watter metode van doop moet ons volg en wie
sal dit uitvoer? Die ware doop is die doop van ‘n nuwe bekeerde
gelowige en vind plaas in die plaaslike gemeente deur middel van ‘n eenmalige onderdompeling van die persoon
in water, terwyl die persoon wat die doop uitvoer verklaar dat dit in die naam
van die Vader, die Seun en die Heilige Gees gedoen word (Matt. 28:19; Hand.
8:38-39). Die Bybel leer ons dat die apostels en diakens mense gedoop het. Wat
van die doop van die Heilige Gees? Daar moet ‘n duidelike onderskeid
getref word tussen die waterdoop van die gelowige en die geestelike doop van
die Heilige Gees (Rom. 8:9; 1 Kor. 12:3,13). Die doop van die Heilige Gees vind
eenmalig en oombliklik plaas wanneer die gelowige by wedergeboorte die inwoning
van die Heilige Gees deelagtig word en die Heilige Gees ons dan ook in die
liggaam van Jesus Christus, die kerk, plaas (Rom. 8:8-9; 1 Pet. 1:2; Hand.
11:16; Tit. 3:5). Wat beteken die doop? Dat die gelowige nie skaam is om hom of
haar te vereenselwig met die sterwe, die begrafnis en die opstandingslewe van
die Here Jesus Christus nie. Dit is vir ons ‘n openbare getuienis dat ons Jesus
Christus as persoonlike Verlosser en Saligmaker aanvaar het en nou deel in die
nuwe lewe in Christus Jesus. Is daar enige verskil tussen die doop
waarmee Jesus Christus gedoop is en die doop van Johannes die Doper en die doop
van gelowiges? Johannes se doop was ‘n doop tot bekering en vergewing
van sondes. Jesus het nooit sonde gedoen nie en daarom kon die betekenis van
Jesus se doop deur Johannes die Doper nie dieselfde wees nie. Jesus se doop het
Sy bediening bevestig, en die verklaring van God uit die hemel was ‘n teken dat
Jesus se bediening op aarde begin het. Die doop van gelowiges is nie dieselfde
as een van die bogenoemde nie, maar wel ‘n publieke demonstrasie van die
vereenselwiging van die gelowige met die dood, begrafnis en opstanding van die
Here Jesus Christus in ‘n nuwe lewe. Het die doop enige inherente reddingskrag of
spesiale seëning? Die doop is nie in staat of bekwaam om ons te red nie
en is ook nie ‘n afwassing van ons sondes nie. Dit het geen spesiale seëning
nie en het daarom geen krag op sigself nie. Noag, soos met Abraham, se siele is
gered soos alle gelowiges van alle tye alleenlik op grond van hulle geloof in
God. Hulle is gered op grond van hulle geloof, terwyl die doop nie ter sprake
was nie. (1 Pet. 3:18-20) Waarom moet ons gedoop word? Dit is
vir die opregte gelowige ‘n stap in gehoorsaamheid aan en natuurlike
uitvloeisel van die groot opdrag van Jesus Christus in Matt. 28:19. Dit word
gedoen sodat ons daardeur kan getuig van ons eenheid met Christus Jesus en ons vereenselwiging
met sy dood en opstanding (Hand. 2:41).
Enige persoon wat die evangelie van God se genade
in die kruisdood van Christus Jesus as betaling vir individuele sonde verstaan
en deur geloof tot bekering kom, kan vrywilliglik besluit om gedoop te word in die plaaslike gemeente.
Toepassing: Verstaan jy die betekenis van die doop
vir jou lewe en Christelike getuienis?
No comments:
Post a Comment